ភ្នំពេញ៖ សហភាពសហព័ន្ធអ្នកសារព័ត៌មានកម្ពុជា (ស.ស.ស.ក) បានចាត់ទុកការប្រមាថជាបន្តបន្ទាប់របស់លោក សម រង្ស៊ី លើព្រះមហាក្សត្រកំពុងបង្កើតកំហុសឆ្គងនយោបាយ និងភាពបរាជ័យ និងបានបង្ហាញឱ្យកាន់តែច្បាស់ពីចរិតនយោបាយអន់ថយនិងហ្វាស៊ីស។

ក្នុងសេចក្ដីថ្លែងការណ៍ចុះថ្ងៃទី២៨ ខែតុលា ប្រធានសហព័ន្ធអ្នកសារព័ត៌មានកម្ពុជាលោក ហ៊ុយ វណ្ណៈ បានកត់សម្គាល់ពីទង្វើរបស់ទណ្ឌិត សម រង្ស៊ី នាពេលថ្មីៗនេះត្រូវបានក្រសួងស្ថាប័ន មន្ត្រីរាជការ កងកម្លាំងប្រដាប់អាវុធ ព្រះសង្ឃ ញាតិវង្សានុវង្ស គណបក្សនយោបាយ និង សាធារណជនថ្កោលទោស ដោយចាត់ទុកថាជាអំពើក្បត់ជាតិ និងប្រៀបដូចនឹងទង្វើដ៏គ្រោះថ្នាក់របស់ ប៉ុល ពត ដែលជាទមិឡឥតសាសនាបំផ្លិចបំផ្លាញសង្គមជាតិ។

សហភាពសហព័ន្ធអ្នកសារព័ត៌មានកម្ពុជាបានកត់សំគាល់ថា៖ «មុំដ៏សំខាន់សម្រាប់ទ្រលំនឹងជាតិយើង មានតួអង្គកំពូលទាំងបីគឺ ព្រះមហាក្សត្រ រាជរដ្ឋាភិបាល និងប្រជាជន ហើយទោះបីក្នុងតម្លៃណាក៏ដោយ និងក្នុងការគោរពដល់ភាពថ្លៃថ្នូរ កម្ពុជាមិនអាចអនុញ្ញាតឱ្យមានអំពើប្រមាថ ការបំបែកបំបាក់ រួមទាំងការបំផ្លាញចំពោះគុណសម្បត្តិ និងគុណតម្លៃរបស់ ឥស្សរជន និង ស្ថាប័នជាតិនោះឡើយ ព្រោះជាតួអង្គដែលតំណាងឱ្យផលប្រយោជន៍រួមដ៏ឧត្តុង្គឧត្តមរបស់ជាតិនិងប្រជាជន»។

លោក ហ៊ុយ វណ្ណៈ បានរម្លឹកឱ្យលោក សម រង្ស៊ី គួរតែមានភាពអៀនខ្មាស់ខ្លួនឯង និងមិនត្រូវបង្កើតលេស និងទម្លាក់នូវអ្វីដែលជាកំហុសរបស់ខ្លួនបន្ទោសទៅអ្នកដទៃនោះទេ។ លោកក៏បានលើកឡើងដោយជំរុញកុំឱ្យមើលស្រាល ឬធ្វេសប្រហែសចំពោះជនដែលលោកហៅថាជាហ្វាស៊ីសនេះផងដែរ។

លោកថា៖ «នយោបាយជាផ្នែកនៃដំណើរកម្ពុជា ហើយដើម្បីធានាបាននូវស្ថិរភាព សន្តិភាព និងការរីកចម្រើនរបស់សង្គមជាតិ កម្ពុជាមិនត្រូវធ្វេសប្រហែស មិនត្រូវមើលស្រាល និងមិនត្រូវឱ្យកើតមាន ជាថ្មីនូវជនហ្វាស៊ីស ព្រមទាំងមនោគមវិជ្ជារបៀបទមិឡឥតសាសនា មានឱកាសបំផ្លិចបំផ្លាញមាតុភូមិកម្ពុជា បានឡើយ ទាំងក្នុងបច្ចុប្បន្ន និងតទៅអនាគត»៕